काठमाडौं : सेयर बजारमा लगानी गर्न लगानीकर्ता हौसिएका छन्। पछिल्लो केही समययता सेयर बजार कारोबार उत्साहजनक ढंगले भइरहेको छ। केही समयअघि हाइड्रोमा झुम्मिएका लगानीकर्ताहरू केही दिनयता बैंकिङ क्षेत्रमा आकर्षित हुन थालेका छन्। कुनै समय २० करोडको कारोबार हुन पनि मुस्किल भइरहेको बेला पछिल्ला दिनमा कारोबारमा नयाँ रेकर्ड कायम भइरहेका छन्। जेठ महिनामा मात्रै तीनवटा भन्दा बढी रेकर्ड भइसकेका छन्। सेयर बजारमा नयाँ रेकर्ड कायम गर्दै आइतबार १९ अर्ब ५५ करोडको कारोबार भएको छ। गत आइतबार १७ अर्ब २७ करोडको कारोबार भई नयाँ रेकर्ड कायम भएको थियो। यसअघि बजेट आएको दोस्रो दिन जेठ १६ गते पनि नयाँ रेकर्ड कायम राख्दै १७ अर्ब २ करोडको कारोबार भएको थियो। कारोबार मात्र होइन सेयर बजारका सबै सूचक सकारात्मक ढंगले अघि बढिरहेका छन्।
नेप्सेका अनुसार २ सय २१ कम्पनीका १७ करोड ५ लाख ९० हजार ६ सय ४३ कित्ता सेयर ८३ अर्ब १३ करोड ९२ लाख ५० हजार ७ सय ६७ मा कारोबार भए। आइतबार नेप्से मापन गर्ने सूचक ३८.३२ अंकले बढेर परिसूचक २९८३.३२ विन्दुमा रोकिएको छ। आइतबार २ सय २० कम्पनीको १ लाख ८२ हजार ४ सय ३० कित्ता सेयर किनबेच भएको छ।
सेयर विश्लेषक सन्तोष मैनाली पछिल्लो समयमा लगानीकर्ता सेयर बजारमा आकर्षित हुँदै गएको बताउँछन्। लकडाउनले सबैको ध्यान सेयर बजारमा खिच्नुका साथै प्रविधि सहजताले पनि कारोबार बढाएको उनी ठान्छन्। ‘सर्वसाधारण लगानी गर्न चाहिरहेका छन् । सेयर बजारको उत्साहले थोरै पुँजी भएका कम्पनीले पनि सर्वसाधारणबाट रकम लिएर देश विकासका लागि उदाहरणीय काम गर्न सक्ने देखिएको छ।
पुँजीबजारको आकार बढेर चिन्ता लिनु नपर्ने ती विश्लेषकको भनाइ छ। मार्केट बढ्नु जोखिम नभई दीर्घकालीन विकासको आधार भएको उनको बुझाइ छ। सेयर बजारको उत्साहले अब देश गरिबीमै रहन सक्दैन भन्ने देखाउँछ। तरलता र ब्याजदरले पनि सेयर बजारमा सहजता ल्याएको सेयर विश्लेषक मैनाली बताउँछन्। ‘लगानीकर्ता दिन आइरहेका छन्, कम्पनीले लिन आउनुपर्छ।’ पछिल्ला केही समययता हरेक दिनजसो १० अर्बभन्दा बढीको कारोबार भइरहेको छ। यो सातामा ८३ अर्बको कारोबार भएको छ। नेप्सेका अनुसार कारोबार भएका साताका पाँच दिन नै औसतमा १६ अर्ब रुपैयाँको कारोबार भएको छ।