दुई चरणमा सम्पन्न स्थानीय तहको निर्वाचनपछि नेपाली कांग्रेसका नेता, कार्यकर्ता, शुभेच्छुक तथा लोकतन्त्रप्रति आशा र विश्वास राख्ने समुदाय एवं आम मतदातामा ठूलो निराशा छाएको छ । १३ औं महाधिवेशन पछाडि पार्टी अपेक्षा अनुरूप संस्थागत ढंगले चल्न सकेन । राष्ट्र, राष्ट्रियता र जनताका लागि विगतमा पटक–पटक ऐतिहासिक जिम्मेवारी निर्वाह गर्दै आएको तथा गरिमामय इतिहास बोकेको देशको सबैभन्दा ठूलो दल स्थानीय तहको निर्वाचनमा किन यति धेरै कमजोर देखियो ? संवेदनशील र राष्ट्रिय मुद्दामा कांग्रेसले अपेक्षा अनुरूपको भूमिका खेल्न सकेन । यति लामो समयसम्म पार्टीको पदाधिकारी चयन हुन नसक्नु, केन्द्रीय समितिले पूर्णता पाउन नसक्नु एवं विभागहरू गठन हुन नसक्नु पार्टीकै निम्ति दुर्भाग्य हो । टिकट प्राप्तिमा धेरैले आकांक्षा राख्नु स्वाभाविक हो, तर टिकट वितरणपश्चात पार्टीको उम्मेदवारलाई जिताउन लाग्नुको सट्टा असन्तुष्ट समूहलाई आपसमा मिलाएर हराउन लाग्दा कसरी आउँछ, राम्रो परिणाम ? निर्वाचनका समय पार्टीका साथीहरू साना–तिना समस्या र मनमुटावमा अल्झिरहनुभयो । अन्तिम समयमा टिकट वितरण गरिएकाले स्थानीय तहका साथीहरूबीच पैदा भएका मनमुटावलाई समाधान गर्न सकिएन र त्यसका लागि पर्याप्त समय पनि भएन ।
सिंहदरबारले जनताको अधिकार सुरक्षित गर्न र समानुपातिक ढंगले देश विकास हुनसकेन भनी हरेक नगरपालिका र गाउँपालिकामार्फत स्थानीय स्तरमै सिंहदरबार पुर्याउने कल्पनासाथ नेपालको संविधान जारी गरेको नेपाली कांग्रेस कहाँ–कहाँ चुक्यो ? यसको गम्भीर रूपले समीक्षा गर्नु जरुरी छ । कांग्रेस नेतृत्वदेखि पार्टीका नेता तथा कार्यकर्ताले आ–आफ्नो तहबाट भएका कमी–कमजोरीको समीक्षा गर्दै भविष्यमा पार्टीलाई माथि उठाउने बाटो तय गर्नु जरुरी छ । नेपाली कांग्रेस अझै ‘पार्टी’ बन्नसकेको छैन । यो बीचमा सांगठनिक गतिविधि शून्यप्राय: रह्यो । शीर्ष नेताहरू गुट–उपगुट र भागबन्डाको राजनीतिमा रुमल्लिरहनुभयो । यसकारण राष्ट्रिय राजनीतिमा कांग्रेसको भूमिका अत्यन्तै फिका देखियो । सामुहिक भावना र संस्थागत ढंगले पार्टी सञ्चालन हुन नसकेपछि सिंगो पार्टी गुट–उपगुटमा विभाजित छ भन्ने कुरा कसैबाट छिपेको छैन । केन्द्रमा शक्ति हुनेले केन्द्रमै पेल्ने प्रवृत्ति देखाउँदा जिल्ला, क्षेत्र हुँदै स्थानीय तहको गाउँ र नगरको वडासम्ममा यसैको नक्कल भएको छ । केन्द्रीय नेताहरू प्रत्येक जिल्ला पुगेर कार्यकर्ता साथीहरूको असन्तुष्टिलाई सम्बोधन गर्न नसक्नु र सबैलाई सँगै निर्वाचनमा लैजान नसक्नु केन्द्रकै कमजोरी हो ।
