- राजेन्द्र कार्की
दच्छिणी दाईले
उत्तरी भाईले
बारीमा डोजर चलाए
पुर्जा देखाउने हामीलाई
राइफल देखाए
दाजु घर आउन है !
_____________________________
गुराँसे डाँडालाई बमले उड़ाए
औंठा छाप नपाउँदा बैरीले
आमाको औंला चुणाए
हेर्दा-हेर्दै झन्डा ठड्याए
दाजु घर आउन है !
_____________________________
डाँफेको शिकारमा ब्यारेक बनाए
पानीको मुहानमा बाँध अड्याए
सुख्खा घाँटिमा आमा पानी
भन्दै तिम्रै नाम लिन्छिन्
दाजु घर आउन है !
______________________________
हिमाल हाँस्ने गाउँलाई घाट बनाए
चौंरी मारी सड़क बनाए
दिउँसै रात पर्यो हामीलाई
माटो फर्काउन,
आमा बचाउन,
बैनी जोगाउँन
दाजु घर आउन है !
