२ फागुन, काठमाडौं । दुबै दलका नेताहरुले बताएअनुसार एकतापछि पार्टीमा एमाले अध्यक्ष केपी ओली र माओवादी अध्यक्ष प्रचण्डको संयुक्त नेतृत्व हुनेछ भने प्रधानमन्त्री आलोपालो हुनेछन् । पार्टी एकता संयोजन समितिमा छलफल लम्बिएपछि बुधबार एमाले र माओवादी केन्द्रको पार्टी एकता वार्ताले पूर्णता पाउन सकेन । यद्यपि पार्टी र सरकारको नेतृत्व भागवण्डामा चलाउन शीर्ष नेतृत्व सहमत भएका छन् । यसलाई अन्तिम रुप दिन बुधबार मानभवनस्थित एक घरमा एकता संयोजन समितिको बैठक झण्डै ४ घन्टा चलेको थियो । एमाले र माओवादीबीच ओली र प्रचण्ड आलोपालो प्रधानमन्त्री हुने सहमति पनि जुटेको बताइएको छ । तथापि आलोपालो सरकार चलाउने माओवादी प्रस्तावमा एमालेभित्र केही असन्तुष्टि छ । शीर्ष नेताहरुले प्रस्तुत गरेको एजेण्डा गम्भीर र सकारात्मक भएको माओवादी नेता नारायणकाजी श्रेष्ठले बताए । उनका अनुसार भोलि थप छलफल हुनेछ । एमाले उपाध्यक्ष वामदेव गौतमले भने ९५ प्रतिशत कुरा मिलेको प्रतिक्रिया दिएका छन् । संयोजन समितिको बैठकअघि एमाले स्थायी कमिटी र माओवादी केन्द्रीय कार्यालयका छुट्टा-छुट्टै बैठक बसेको थियो, जहाँ ओली र प्रचण्डले आफूहरुबीच भएका वार्तामा आफूहरुबीच भएको सहमति जानकारी गराएका थिए ।
माओवादी नेताहरुले भने भद्र सहमति भइसकेको दाबी गर्दै आएका छन् । एमालेभित्र केही नेताहरु आलोपालोको विपक्षमा रहे पनि यद्यपि वाम गठबन्धनका सुत्रधार एमाले उपाध्यक्ष वामदेव गौतमले सार्वजनिक रुपमा नै आलोपालो प्रधानमन्त्रीको सहमति भएको यसअघि नै बताउँदै आएका छन् । बुधबार एमाले अध्यक्ष ओलीले ‘प्रचण्डजीले जोड दिनुभएको छ’ भन्दै आलोपालो स्वीकार गरेको पार्टी नेताहरुलाई बि्रफिङ गरेका छन् ।
