नेपाली दिदीबहिनीले दुख बिर्सिएर नाचे अनि गाए नेपाली संस्कृति,परम्परा र चाडबाडलाई भब्य एवं सभ्य रुपले मान्दै र धान्दै आएको हंगकंगमा क्रियाशील हंगकंग नेपाल हिन्दू एसोसिएसनले आयोजना गरेको सामूहिक तीज कार्यक्रम सम्पन्न भएको छ I एसोसिएसनले हंगकंगको यौमताइमा संचालन गरेको हिन्दू मन्दिरमा आयोजना गरिएको सामूहिक तीजमा यहा रहेका नेपाली दिदीबहिनीहरूले दर खाएर नेपाली लोक भाकामा तीज गीत गाएर रमाइलो गरेका थिए I यसरी कार्यव्यस्तताबाट एक दिन भए पनि छुट्कारा पाएर रमाइलो गर्न पाएकोमा निकै खुशी लागेको उनीहरूले बताए I मन्दिर परिसरमा आयोजना गरिएको कार्यक्रममा बिधिबत पूजापाठ तथा स्वस्तिशान्ति समेत गरिएको थियो I सम्पूर्ण नपाली दाजुभाई तथा दिदीबहिनीहरूको कार्य सफलता तथा सुस्वास्थ्यको कामना गर्दै पूजापाठ समेत गरिएको मन्दिरका मूल पुरोहित पण्डित माधब आचार्यले बताउनुभयो I यसैबीच आयोजना गरिएको औपचारिक सभामा एसोसिएसनका आजीवन सदस्यहरूलाई आजीवन सदस्यताको प्रमाणपत्रबाट सम्मान गरिनुका साथै परिचयपत्र समेत वितरण गरिएको थियो I सो अवसरमा बोल्दै प्रमुख अतिथि समेत रहनुभएका मूल पुरोहित माधब आचार्यले धर्म ,संस्कृतिले समाजमा नैतिक जागरण ल्याउने तथा संस्कारको बिकास गर्ने हुदा मानव समुदायका लागि धर्म र अध्यात्म अनि आवश्यक रहेको बताउनुभयो I आध्यात्मिक पत्रकार समाजका अध्यक्ष्य तथा आध्यात्मिक पत्रिका कवचका सम्पादक शिरोमणि दवाडीले हाम्रा सनातन धर्म संस्कृति वैज्ञानिक तथा तथ्यपरक भएकाले यसको महत्व बुझेर लाग्न सकेमा यसले व्यक्ति ,समुदाय र अन्तराष्ट्रिय जगतकै हित हुने बताउनुभयो I एसोसिएसनकी अध्यक्ष्य गोमा देवी शर्माले सनातन धर्मको रक्षार्थ तथा प्रवासमा रहेका नेपाली समुदायलाई एकताबद्ध गराउन संस्था स्थापना गरिएको जानकारी गराउनुभयो I सचिव प्रमिता राई तथा कोषाध्यक्ष अमिता रानाले सम्पूर्ण नेपाली दिदीबहिनीलाई हिन्दूमन्दिर तथा एसोसिएसनको छातामा आबद्ध भई धर्म ,संस्कृतिको रक्षाका लागि एकताबद्ध हुन आग्रह गर्नु भएको थियो I सन् २०१० मा स्थापना गरिएको हिन्दू मन्दिरले बार्षिक कार्यतालिका बनाएर हरेक चाड तथा तिथिमा विभिन्न पूजा तथा धार्मिक अनुष्ठान गर्दै आएको छ I यस अघि श्रावणको सोमबार बोलबम यात्रा ,श्रीकृष्ण जन्म आष्ठमी उत्सव समेत भव्यताका साथ सम्पन्न गरेको थियो I हाल अस्थाई भाडाको घरमा रहेको मन्दिरलाई २ बर्षमा स्थाई रुप दिने लक्ष्य राखिएको एसोसिएसनकी अध्यक्ष्य शर्माले जानकारी दिनुभएको छ I