काठमाडौँः चीन भ्रमणमा रहेका उपप्रधान तथा अर्थमन्त्री कृष्णबहादुर महराले चिनियाँ प्रधानमन्त्रीली खछ्याङसँग भेटवार्ता गरेका छन् । चिनियाँ प्रधानमन्त्रीले भने चीनसँग भएका सम्झौता कार्यान्वयनका विषयमा जिज्ञासा राखेका छन् । भेटमा उपप्रधानमन्त्री महराले नेपालको पछिल्लो राजनीतिक घटनाक्रमबारे जानकारी गराएका छन् । चिनियाँ प्रधानमन्त्री र उपप्रधानमन्त्री महराबीच दुई देशको सम्बन्धलाई अझ प्रगाढ बनाउने विषयमा छलफल भएको नेपाली राजदूतावास बेइजिङले उल्लेख गरेको छ । महरासँगको भेटपछि प्रधानमन्त्री लीले भनेका छन्, ‘नेपालका राजनीतिक दलहरु मिलेर संविधानलाई कार्यान्वयनको दिशामा अग्रसर हुनेछन् भन्ने मेरो विश्वास छ।’ महरासँगको भेटमा चिनियाँ प्रधानमन्त्रीले नेपालको सामाजिक आर्थिक विकासमा चीनको सहयोग निरन्तर जारी रहने प्रतिबद्धता जनाएका छन् । चिनियाँ राष्ट्रपति सी जिनपिङको नेपाल भ्रमण वातावरण तयार पार्न र पुष्पकमल दाहाल ‘प्रचण्ड’ नेतृत्वमा सरकार बनेपछिको राजनीतिक घटनाक्रम जानकारी गराउन चीन पुगेका महराले केपी शर्मा ओली नेतृत्वको सरकारले गरेका सम्झौता कार्यान्वयन हुने प्रतिबद्धता व्यक्त गरे ।