माघ २६, काठमाडौँ – त्रिभुवन अन्तर्राष्ट्रिय विमानस्थल सुधार परियोजनाअन्तर्गत काठमाडौँको गुह्येश्वरी, जडीबुटी र कोटेश्वर क्षेत्रको धावनमार्ग विस्तारका क्रममा छन् । उक्त परियोजनाको ‘आइसिबी १’ अन्तर्गतको कार्यक्रम अहिले सञ्चालन भइरहेको छ । जडीबुटी र कोटेश्वर क्षेत्रमा ३०० मिटरको धावनमार्ग विस्तार गर्ने योजना छ । यसअनुसार अहिले २५ मिटरको खाडल पुर्ने काम भइरहेको छ । त्यस्तै, गुह्येश्वरी क्षेत्रअन्तर्गत हवाइजहाज पार्किङका लागि २२ मिटर खाडल पुर्ने काम भइरहेको प्रवक्ता केसीले बताए ।“एप्रोच लाइट हटाउने काम रातिमात्रै भइरहेको छ, यसले गर्दा काम ढिलो रुपमा अघि बढिरहेको छ,” उनले भने । निकट भविष्यमा सो धावनमार्गलाई ट्याक्सी मार्गसँग समानान्तर रुपमा जोड्ने योजना रहेको केसीले सुनाए । गुह्येवरीतर्फ धावनमार्गको विस्तारपछि २० वटाभन्दा बढी हवाइजहाज पार्किङ गर्न सकिने बताइन्छ । यसका लागि त्यहाँ माटो ओसारपसारको काम भइरहेको छ ।
विमानस्थल सुधार परियोजनाअन्तगर्तको पहिलो परियोजना सन् २०१३ देखि सन् २०१७ सम्ममा सम्पन्न गर्ने समयसीमा भएपनि लक्ष्यअनुसारको काम भने हुन सकिरहेको छैन । यद्यपि तोकिएको समयसीमाभित्रै परियोजना सम्पन्न गर्ने प्रतिबद्धता नेपाल नागरिक उड्डयन प्राधिकरणको छ । आगामी दिनमा दुईवटा कन्भेयर बेल्ट थप्ने योजना प्राधिकरणको छ । यसका लागि आइनेको कम्पनीले बोलपत्र हाल्ने सहमति जनाइसकेको छ ।
