काठमाडौं : सर्वोच्चअनुसार जबराले बुधबार इजलास तोकेर मुद्दाको सुनुवाइ गरेका हुन् । दुई मुद्धामा कारण देखाउ आदेश जारी गरेका छन् भने एक मुद्दा तामेलीमा राखेका छन् । न्यायीक नेतृत्वले न्याय क्षेत्रमा विचलन देखाएको आरोप खेपिरहेका चोलेन्द्र शमशेर जबरा दबाबमा रहेपनि राजीनामा नदिने मुडमा छन् । प्रधानन्यायाधीश एकातिर छन् भने सर्वोच्चकै न्यायाधीशहरु र कानुन व्यवसायीहरु अर्कोतिर छन् । संवैधानिक निकाय, राजदूत र मन्त्रीमा भाग मागेको, न्यायाधीश हरिकृष्ण कार्कीको नेतृत्वमा गठन भएको सुझाव कार्यदल कार्यान्वयनमा चुकेको र न्याय परिषद्बाट मनपरी न्यायाधीशहरुको सरुवा र नियुक्तिमा चलखेल गरेकोजस्ता प्रधानन्यायाधीशमाथि आरोप छन्। जबराले संवैधानिक व्यवस्थाअनुसार आफू नियुक्त भएको भन्दै सडकबाट आन्दोलन हुँदैमा आफूले राजीनामा नदिने प्रतिकृया दिएका छन् । न्यायाधीशहरुको इजलास बहिष्कारका बीच जबराले बुधबारदेखि मुद्धा हेर्न थालिसकेका छन् । प्रधानन्यायाधीश जबरा पदमा रहँदासम्म कानुन व्यवसायीहरु आजदेखि सर्वोच्च अदालतमा बहस नगर्ने बताए । कानुन व्यवसायीहरुले वर्तमान गतिरोधको जिम्मा प्रधानन्यायाधीशले लिनुपर्ने अडान लिएका छन्।
