विजय थापा, वाशिंगटन डिसी,भारतले गरेको अघोषित नाकाबन्दी र अमानवीय ब्यबहारविरुद्व जारी विरोध प्रदर्शनलाई अमेरिकाले पनि चासो व्यक्त गरेको छ । अमेरिकाको म्यारिल्याण्ड राज्यका सिनेटर बेन्जामिन एल कारडीनले नेपाली समुदायलाई पत्र लेख्दै नेपाल र नेपालीको हितको लागि समर्थन गर्ने पत्रमार्फत जानकारी गराएका हुन् । उनले आफ्नो पत्रमा हालसालै सयुक्त राष्ट्र सङ्घले नेपालले भोगिरहेको डरलाग्दो मानवीय सङ्कटको बारेमा चेतावनी दिएको कुराको संस्मरण गराएका छन् । उनले पत्रमा नेपाल भूकम्पको प्रभावले आक्रान्तबाट मुक्त नभइ सकेको अवस्था हुँदाहुँदै हाल आएर खान पकाउने इन्धन, खानेकुरा, ओखतिको चरम अभाव तथा राजनैतिक झगडाको कारण हुन गएको विद्यालय बन्द जस्ता विषय तुरुन्तै समाधान गर्नु पर्ने कुरामा जोड दिएका छन् । सिनेटर बेन्जामिनले ‘नेपालको सीमा क्षेत्रमा भैरहेको समस्याको कारणले भूकम्पको प्रभावबाट अवस्थामा गुजरिएको देशमा खाना, आश्रय तथा ओखती जस्ता चीज शीघ्र आवश्यक हुने हुनाले तुरुन्तै चाजो मिलाउनुपर्ने’ पत्रमा उल्लेख गरेका छन् । मानवीय सहयोग तथा आवश्यक सामग्री नेपाल भित्रिनुपर्ने उनको भनाइ छ ।
साथै, आफूले संसदमा नेपालको पुनर्निर्माणमा सहयोग गर्ने हेतुले नेपाल पुनर्निर्माण कानुनको सुरुवात गरिसकेको उनले बताएका छन् । आफू र सिनेटर मार्क किर्क नेपालको पुनर्संरचना विद्यालय ,बाटोघाटो तथा भविष्यमा प्राकृतिक प्रकोपबाट अपनाउनु पर्ने साबधान सम्बन्धी आदिमा समर्थन गर्ने र सहयोग गर्ने उनले आश्वासन दिएका छन् । तराई क्षेत्रमा झन्डै १५ लाख बालबालिका पाठशाला जानबाट बन्चित भएको सयुक्त राष्ट्र सङ्घ बालकोषले उद्धृत गरेको जनाउँदै उनले पत्रमा युवाहरू नेपालको भविष्य निर्माण गर्ने काममा अहम भूमिका निर्वाह गर्ने छन् भनेका छन् ।