३ असार, काठमाडौं : २९ गते आएको बाढीका कारण वीचमा केही मिटर भासिएको बबई पुलमा कसको कमजोरी छ ।नेकपाका नेता वामदेव गौतमको गृह जिल्ला बर्दियाको जब्दीघाटस्थित बबई नदीमा पक्की पुल भासिएको एक वर्ष बित्नै लाग्यो । ठेकेदार पप्पु कन्स्ट्रक्सनले समयभन्दा अगावै पुल बनाएर हस्तान्तरण गरेको तर, एक वर्षपछि बाढीका कारण पुल भासिएको दाबी गर्दै आएको छ । दोषी खोज्ने क्रममा अहिले बबई पुल प्रकरण अख्तियारको कोर्टमा पुगेको छ । विषय अदालतमा समेत प्रवेश गरिसकेको छ । सरकारले समयमै काम नगर्ने ठेकेदारहरुको सूची तयार पारेर कारवाहीको चेतावनी दिइरहेका बेला बबई पुलको मुद्दा अलि फरक ढंगले सतहमा आएको छ । सडक विभाग अन्तरगत पुल विभागका हाकिमहरुले भने पुल भत्किनुमा पप्पु कन्स्ट्रक्सन नै दोषी रहेको बताउँदै आएका छन् ।
जीर्ण बबई पुलको अवस्था र हालसम्म भइरहेको विवादका विषयमा केही सूचना दिने प्रयास गरेको छ । बबई नदीमा पुल निर्माणका लागि ०६८ साल असार २२ गते पप्पु कन्स्ट्रक्सन र सडक डिभिजन कार्यालय बाँकेवीच सम्झौता भएको थियो । सम्झौतापत्रमा डिभिजन कार्यालयका तत्कालीन प्रमुख भानु जोशीले हस्ताक्षर गरेका थिए । कुल १६ करोड ६८ लाख ४ हजार ३०८ रुपैयाँमा पप्पु कन्स्ट्रक्सनले पुलको ठेक्का हात पारेको थियो ।, निर्माण सम्पन्न भएको एक वर्षपछि बाढीले पुल भत्काएकोमा सरकारी कर्मचारीले आफ्नो कमजोरी ढाकछोप गर्न निर्माण कम्पनीलाई दोष देखाइरहेको छ ।
पप्पु कन्स्ट्रक्सनलाई पुल निर्माणको ठेक्का दिने क्रममा सडक विभाग अन्तरगत पुल विभागका कर्मचारी र इञ्जिनियरहरुले समेत लापरवाही गरेको ठेकेदार कम्पनीको आरोप छ । र, सोही लापरवाहीकै कारण पुल भासिएको हुन सक्ने विषयमा अझैसम्म गहिरो गरी छानविन हुन सकेको छैन । अहिले अख्तियारले सरकारी कर्मचारी र इञ्जिनियरमाथि पनि छानविन गरिरहेको छ । बबईको पुलको पिल्लर ‘वेल डिजाइन फाउन्डेसन’ मार्फत बनाइएको भए पिल्लरको गोलाइ ७ मीटरको हुने थियो र फाउन्डेसन पनि बलियो हुने थियो । ७० सेमी गोलाकार पिल्लर बोरिङ प्रविधिबाट राखेर पुल निर्माण गरिएपछि वर्षायामको बाढी आउँदा पिल्लर भासियो ।