काठमाडौं। नेपाली उद्योगहरुले धागोमा किर्तिमानी निर्यात व्यापार गरेका छन् । भारत, टर्की, भियतनाम लगायतका मुलुकबाट धागोको माग बढेपछि स्वदेशी उद्योगको निर्यातमा वृद्धि भएको छ । कोरोना महामारीमा समेत बन्द नभएको धागो उद्योगहरुले अहिले थप देशहरुमा आफ्नो बजार खोज्ने प्रयास गरिरहेका छन्। त्यही प्रयासस्वरुप अहिले उद्योगीले जापानमा समेत नेपाली धागोको नमुना पठाइएको धागो उद्योगी पवन गोल्याणले जानकारी दिए। भियतनाममा नेपाली धागोका लागि बजारको ढोका खुलेसँगै यसबाट रिलायन्स, त्रिवेणी र जगदम्बा स्पिनिङ मिल्स लगायतका स्वदेशी धागो उद्योगलाई प्रत्यक्ष फाइदा मिल्ने देखिएको छ।
नेपालबाट हुने सबैभन्दा ठूलो निर्यात हिस्सा भारतको छ । चालु आर्थिक वर्षको पहिलो पाँच महिनामा भारतमा मुख्य (सर्वाधिक रकमको) निर्यात भएका वस्तुहरुमध्ये पाँचौंमा धागो परेको छ । यो पाँच महिनामा नेपाली उद्योगहरुले भारतमा मात्र एक अर्ब २३ करोड २० लाख रुपैयाँको धागो निर्यात गरेका छन् । नेपालबाट भारतमा ७३ लाख २७ हजार केजीबराबर पोलिष्टर धागो निर्यात भएको हो । यसअघि कुनैपनि आर्थिक वर्षमा नेपालबाट यो परिमाणको धागो निर्यात हुन सकेको थिएन । चालु वर्षको पाँच महिनामा टर्कीमा समेत २९ करोड ६७ लाख रुपैयाँ बराबरको धागो निर्यात भएको छ। यस्तै चालु आवबाटै नेपाली धागोले प्रवेश गरेको नयाँ अन्तरराष्ट्रिय बजार भियतनामा समेत नेपाली धागो निर्यातले गति लिन थालेको छ। नेपालबाट चालु वर्षको पाँच महिनामै करिब २३ हजार केजी धागो भियतनाम निर्यात भइसकेको छ। यो निर्यातको मूल्य ९१ करोड ५८ लाख रुपैयाँ बराबर हो।