लगानीकर्ताको कमजोरीका कारण नै कतिपयले बैंक खातामा नगद लाभांस अनि डिम्याट खातामा बोनस तथा हकप्रद नपाउने अवस्था देखिन थालेको छ । पुरातन शैलीमा बसिरहेको खण्डमा लाइनमा बसेर नै बोनस अनि लाभांस संकलन गर्छु भन्ने दिन सकिएका छन् । सेयरधनीले कागजी सेयर प्रमाणपत्र अभौतिक नबनाएसम्म लगानीकर्ताको हातमा बोनस सेयर नपर्ने निश्चित भएको छ । लगानीकर्ताले डिम्याट खाता अनिवार्य रुपमा सञ्चालन गरेर सबै सेयर डिम्याट गराए पटक पटक लाभांस अनि बोनस संकलन गर्न दौडनु पर्ने झण्झटबाट छुटकारा पाउने भएका छन् । प्रत्येक पटक लाभांस बितरण गर्ने समयमा सुचिकृत कम्पनीहरुले सूचना निकाल्ने गरेका थिए । यति मात्र नभई कागजी प्रमाणपत्र धारण गरेका लगानीकर्ताका लागि बोनस सेयर पनि कागजी बनाउनु पर्ने अवस्था थियो । यहि अवस्थालाई मध्यनजर गर्दै नबिल बैंकले आफ्ना लगानीकर्ताहरुलाई भौतिक रुपमा बोनस तथा लाभांस पूर्जा बितरण नगर्ने भन्दै कडा सूचना प्रवाह गरेको छ । बैंकले गत आर्थिक वर्षमा ३० प्रतिशत बोनस बितरण गरेको थियो । त्यसै गरी बैंकले नगद लाभांस पनि भौतिक रुपमा बितरण नगर्ने भएको छ । बैंकले अभौतिक सेयर हुनेहरुलाई आफ्नो बिक्री प्रबन्धक नबिल इन्भेष्टमेण्टमा बैंक खाता उपलब्ध गराउन भनेको छ ।
लगानीकर्ताले यसरी विबरण अद्यावधिक नगराएसम्म नगद लाभांस प्राप्त गर्न नसक्ने बैंकले सूचना मार्फत प्रष्ट पारेको छ । बैंकले गत आर्थिक वर्षको कमाईबाट लगानीकर्तालाई बोनस सेयर सहित १८ प्रतिशत नगद लाभांस बितरण गरेको थियो ।अझै पनि केही कम्पनीहरुले यो व्यवस्थालाई अनिवार्य गर्न सक्ने अवस्था छैन । तर अब अनिवार्य नगरी पनि सुख नहुने भएकाले सबै संस्थाहरुले यस्तै कडा सूचना प्रवाह गर्ने पक्का छ । बैंकका अनुसार अभौतिक सेयर धारण गरी बैंक खाताको पर्याप्त विबरण उपलब्ध गराएका सेयरधनीको खातामा लाभांस रकमान्तर गरिसकिएको जनाएको छ । बोनस सेयरको हकमा भने नेप्सेमा सेयर सूचिकरण भए पश्चात सेयर लगानीकर्ताको डिम्याट खातामा जम्मा गरिने बैंकले जनाएको छ ।