४ असोज, काठमाडौं – संयुक्त राष्ट्र संघको महासभालाई सम्बोधन गर्दै प्रधानमन्त्री शरीफले आफ्नो छिमेकीले पाकिस्तानमा अस्थिरता निम्त्याउन चाहेको गुनासो पोखे । पाकिस्तानी प्रधानमन्त्री नवाज शरीफले कुनै पनि प्रकारको बलको धम्की दिएर छिमेकीलाई नतर्साउन भारतलाई चेतावनी दिएका छन् । पाकिस्तानले आतंकवादसँग जुधिरहेको र दक्षिण एशियामा शान्ति सुव्यवस्था कायम गर्न प्रयत्नरत रहेको शरीफले बताए । तर, पाकिस्तानलाई संकटमा फसाउनमा भारत जिम्मेवार रहेको शरीफले आरोप लगाए । गरीबी र शस्त्रीकरण भारत र पाकिस्तानका साझा समस्या भएकाले तिनीहरुसँग मिलेर जुध्न आग्रह गर्दै प्रधानमन्त्री नवाजले आफ्नो छिमेकीलाई कुनै पनि प्रकारको बल प्रयोग गरेर वा बल प्रयोग गर्ने धम्की दिएर नतर्साउन भारतसँग आग्रह गरे ।
एक समय नेपालजस्तै स्वतन्त्र राष्ट्रका रुपमा रहेको कश्मिरलाई त्यहाँका हिन्दु राजाले हस्ताक्षर गरेर भारतलाई बुझाएपछि जम्मु-कश्मिर दशकौंदेखि हिंसाको शिकार बन्दै आएको छ । बहुसंख्यक कश्मिरी जनता भारतमा गाभिएको विरोधमा संघर्षरत छन् । कस्मिरमा राष्ट्रसंघलाई निम्तो पाकिस्तानी प्रधानमन्त्रीले संयुक्त राष्ट्र संघमा एकपटक फेरि कश्मीर मुद्दा उठाएका छन् । भारतले सीमारेखामा संघर्षविराम उल्लंघन गरेको भन्दै शरीफले कश्मिरमा संयुक्त राष्ट्रसंघको अनुगमनकर्ता मागसमेत गरेका छन् ।
यसै क्रममा भारत-पाक सीमानामा सन् २००३ मा भएको युद्धविराम भारतीय पक्षले उल्लंघन गरेको भन्दै पाकिस्तानी प्रधानमन्त्रीले राष्ट्र संघको ध्यानाकर्षण गराएका हुन् ।